झापा, २८ कात्तिक । हँसिलो अनुहार, मिजासिलो व्यवहार र दर्विलो आत्मविश्वास भएकी निर्मला चौहान भण्डारी ‘उद्यमीहरुकी गुरुआमा’ भनेर चिनिनुहुन्छ । मेचीनगर नगरपालिका–१२ निवासी उहाँले बिगत एक दशकमा चार सयभन्दा बढी महिलालाई आफुले जानेको सीप र अनुभव सिकाएर उद्यमी बनाउनु भएको छ ।

“चुलो र भान्सामा सीमित महिला दिदीबहिनीहरुलाई आफ्नै खुट्टामा उभिन सबैभन्दा पहिला आवश्यक कुरा उद्यमशील बन्ने सीप हो,” उहाँ भन्नुहुन्छ– “पुरुषले कमाउँछन् र महिलाले त्यसमै निर्भर हुनुपर्छ भन्ने पुरातन सोचमा परिवर्तन ल्याउन मैले तालिम र उद्यमशीलताको अभियान नै चलाएको छु ।”

उहाँ आफुले सञ्चालन गर्ने तालिम र उत्पादन हुने बस्तुमा स्थानीय स्रोतको प्रयोग गर्नुहुन्छ । मकैको खोसेला, धानको पराल, रुद्राक्षको दाना, केराको दाम्चाको रेसा जस्ता सामग्रीबाट उहाँ आकर्षक झोला, गुन्द्री, पिरा, चप्पल, फूल र सजावटका सामानहरु बनाउन सिकाउनुहुन्छ । घर वरिपरि खेर गइरहेका यस्ता कच्चा पदार्थको उपयोगबाट कलात्मक सामग्री उत्पादन हुँदा मुनाफा राम्रो पाइने र वातावरण संरक्षणमा समेत ठूलो योगदान पुग्ने उहाँको धारणा रहेको छ ।

धुप, साबुन, सरफ, हार्पिक, फिनेल लगायतका दिनहुँ घरमा काममा आउने सामान बनाउन समेत उहाँले तालिम दिदै आउनु भएको छ । गाउँघरमै पाइने तरकारीहरुबाट स्वादिला अचार बनाउने तालिम उहाँले प्रदान गर्दै आउनु भएको छ ।

उहाँले यस्ता तालिमहरु झापा जिल्लामा मात्र नभएर कोशी प्रदेशका विभिन्न जिल्लामा सञ्चालन गर्दै आउनु भएको छ । खासगरी ग्रामीण क्षेत्रका सयौं महिला उहाँबाट सीप सिकेर आयआर्जन गर्ने तहसम्म लाभान्वित भइसकेका छन् ।

सीप सिक्ने र सिकाउने उहाँको यो यात्रा एकाएक सुरु भएको होइन । विद्यार्थी जीवनदेखि नै उहाँ धागो र कपडासँँग खेल्न रुचाउनुहुन्थ्यो । वि.सं. २०५५ तिर इलाम क्याम्पसमा अध्ययन गर्दै गर्दा उहाँमा सामाजिक काम गर्ने र आत्मनिर्भरताका लागि आफू उदाहरण बनेर अरुलाई प्रेरित गर्ने चाहना पलाएको थियो । 

वि.सं. २०५६ मा विवाह गरेर मेचीनगर आएपछि उहाँले वि.सं. २०६४ मा घरेलु कार्यालय झापाले आयोजना गरेको उद्यमशीलता सम्बन्धी १० दिने तालिम लिनुभयो । त्यही तालिमले नै उहाँको जीवनलाई नयाँ मोड दिएको देखिन्छ ।

“हरेक महिलाका लागि क्याम्पसमा पढ्दा र विहे गरेपछिको अवस्थामा परिवर्तन हुन्छ,” उहाँ भन्नुहुन्छ– “मैले चाहिँ विहे गरेपछिको अवस्थालाई जीवनको नयाँ अध्याय सुरु गर्ने अवसरको रुपमा लिएँ । पहिला आफू आत्मनिर्भर हुने र गाउँका दिदीबहिनीलाई पनि त्यही बाटोमा डोहोर्याउने संकल्पका साथ तालिमको भरपूर सदुपयोग गरेँ । यसमा परिवारको दर्विलो साथ थियो ।”

वि.सं. २०६५ मा तत्कालीन धाइजन गाउँपालिकामा सगरमाथा सामुदायिक विकास केन्द्र चन्द्रगढीले आयोजना गरेको सात दिवसीय गुडिया बनाउने तालिम लिएपछि निर्मलामा उद्यमी बन्ने सोच आयो । उहाँले तालिमपछि आफ्नै घरमा ‘जागरुक लघु उद्योग’ स्थापना गर्नुभयो । सुरुवाती समयमा उहाँसँग एउटा सिलाई मेसिन मात्र थियो । घरेलु कार्यालयले सहयोगस्वरुप अर्को मेसिन उपलब्ध गराएपछि उहाँले दुई वटा मेसिनबाट गुडिया र झोलाको व्यावसायिक उत्पादन सुरु गर्नुभयो । 

सुरुसुरुमा त गाउँलेहरुले घरमै उद्योग चल्ने कुरामा पत्यार गरेका थिएनन् । चिटिक्क परेका झोला र गुडिया उत्पादन हुन थालेपछि गाउँघरमै यसको विक्री बढ्यो । वल्लो र पल्लो गाउँ हुँदै सहरसम्म निर्मलाको सीप र उत्पादनको चर्चा र प्रशंसा बढ्न थाल्यो । यसबाट उहाँको ख्याति मात्र बढेन, उहाँसँग तालिम लिन र सामान किन्न आउनेको लर्को नै लाग्न थाल्यो । 

“आफुले उत्पादन गरेको सामान बिक्री हुन थालेपछि मनोबल र उत्साह बढ्दो रहेछ,” उहाँले संघर्षमय दिनहरु सम्झदै भन्नुभयो– “एकातिर आम्दानी बढ्यो, अर्कातिर मलाई पनि सीप सिकाइदिनु भन्दै महिला दिदीबहिनी र संघ संस्थाहरु धाउन थाले । बल्ल आफ्नो सपना पूरा हुन थाल्यो भनेर म झनै उत्साही भएर लागेँ ।” 

त्यसपछि उहाँ कुशल प्रशिक्षकको रुपमा प्रख्यात हुनुभयो । सयौं स्थानमा तालिम दिएका महिलालाई उद्योग खोलेर आफ्ना उत्पादनहरु बजार पुर्याउन प्रेरित गर्न थाल्नुभयो । सबैले उहाँलाई गुरुआमा भन्न थाले ।

उहाँले एक दशकमा पाँच हजारभन्दा बढी महिलालाई आत्मनिर्भर बनाउने तालिम प्रदान गरेको बताउनुभयो । उहाँसँग सीप सिकेका चार सयभन्दा बढी महिलाले घरेलु उद्योग नै सञ्चालन गरिरहेका छन् । “घरमै बसेर थोरै लगानीमा उद्यमी बन्न सकिन्छ भन्ने कुरामा आश्वस्त तुल्याएर सीप सिकाइरहेकी छु,” उहाँ भन्नुहुन्छ– “आफैले सञ्चालन गरेको पुनःजागृति केन्द्र नामक प्रशिक्षण केन्द्र एवम् घरेलु उद्योगमा २५ जना महिलालाई प्रत्यक्ष रोजगारी समेत दिइरहेकी छु । यही सफलता नै मेरो जीवनको सबैभन्दा ठूलो सम्पति हो ।”

वि.सं. २०७२ देखि उहाँलाई सरकारी निकायले प्रशिक्षकको रुपमा औपचारिक मान्यता दिएर तालिमहरुमा परिचालन गर्न थाल्यो । पुनः जागृति सीप केन्द्र नामक तालिम दिने संस्था भने वि.सं. २०७८ मा घरेलु कार्यालयमा दर्ता गराउनुभएको थियो । हाल यही केन्द्रमार्फत उहाँको तालिम र प्रशिक्षण अभियान कोशी प्रदेशका १० जिल्लामा फैलिएको छ । मधेश प्रदेशको सिराहा र सप्तरीसम्म पनि पुगेर महिलाहरुलाई सीप सिकाउने र आत्मनिर्भर बनाउने कार्यमा लागिरहेको उहाँले जानकारी दिनुभयो    ।

उहाँले घरमै बसेर आत्मनिर्भर बन्ने खालका सीपहरुमा महिलाको आकर्षण रहेको र यसबाट महिनामै लाखौं कमाइ गर्न सकिने बताउनुभयो । “सिन्के धुपको विकल्पमा हामीले स्थानीय क्षेत्रमा खेर गइरहेका फूलपातिलाई संकलन गरी धुलो बनाई बाती बनाइरहेका छौं,” उहाँले भन्नुभयो, “तर स्थानीय सरकारले नीति नबनाउँदा बाहिरको सामाग्रीले बजार कब्जा गरेको छ । ग्रामीण महिलाले उत्पादन गरेका बस्तुको बजारका लागि सरकारले सघाउनु पर्ने खाँचो छ ।”

सीप सिक्ने इच्छा शक्ति भएका विपन्न, असहाय र अपांग महिलाहरुलाई घरमै पुगेर निःशुल्क सीप सिकाउने र व्यवसायका लागि स्रोत जुटाइदिने कार्यमा समेत आफू लागिरहेको उहाँले बताउनुभयो । 

कुनै पनि महिलालाई आत्मनिर्भर र उद्यमी बन्न सबैभन्दा परिवारकै साथ हुनु पर्ने उहाँ बताउनुहुन्छ । उहाँले सफल प्रशिक्षक र उद्यमीको रुपमा आफू चिनिनुमा पति राजु भण्डारीको साथ र सहयोग रहेको बताउनुभयो । आवश्यक कच्चा पदार्थ ल्याइदिने, बजारिकरणमा सहयोग गर्ने लगायतका काममा पतिको सहयोग रहेको उहाँ बताउनुहुन्छ । 

मेची उद्योग बाणिज्य संघको उपाध्यक्ष समेत रहनु भएकी निर्मलाले महिला उद्यमी समिति बनाएर त्यसैमार्फत धेरैलाई तालिम, परामर्श र बजारको पहुँचको विषयमा सहयोग गरिरहेको बताउनुभयो । 

महिला उद्यमशीलता अभियानमा लाग्नु भएकी निर्मलाको यात्रा लोभलाग्दो र प्रेरणादायी भए तापनि यस क्षेत्रमा चुनौति र समस्याको चाङ पनि कम छैनन् । “हामीले उत्पादन गरेका सामाग्री राम्रा छन् तर बजार छैन,” उहाँ भन्नुहुन्छ– “ब्रान्डिङ गर्न सकेका छैनौं । बजारमा प्रतिष्पर्धा गर्न सजिलो छैन । राज्यले प्रोत्साहनको उत्साहजनक नीति र कार्यक्रम ल्याउन सकेको छैन ।” 

उहाँ स्थानीय सरकारलाई बजार विस्तारका लागि आग्रह गरिरहेको बताउनुहुन्छ । साप्ताहिक रैथाने बजार सञ्चालन गर्न सके स्थानीय उत्पादनको बजार विस्तार हुने र उद्यमी महिलाहरुलाई राहत पुग्ने उहाँ बताउनुहुन्छ । जहाँ मेला, महोत्सव लाग्छन् त्यही पुर्याएर आफूले उत्पादन गरेका सामाग्रीको विक्री गर्नुपर्ने कतिपय बाध्यता रहेको बताउनुभयो ।

स्थानीय सरकारसँग धेरै पटक नीति बनाएर उद्यमी महिलाहरुलाई सहयोग गर्न आग्रह गरेको बताउनुभयो । महिलाहरुले उत्पादन गरेका झोलाहरु नगरमा सञ्चालन हुने विद्यालयका विद्यार्थीसम्म पुग्ने हो भने पनि धेरैले रोजगार पाउने उहाँ बताउनुहुन्छ । 

उहाँले सीप सिकाउने र सिक्ने संस्कारले बेरोजगारी घट्ने र महिलाको आर्थिक सशक्तिकरणमा मदत मिल्ने बताउनुभयो । उहाँले धेरै महिलाले सीप सिकेर परिवार पाल्न सक्षम भएका उदाहरण दिदैं भन्नुभयो– “मेरो सपना भनेकै हरेक घरका महिला सीप सिकेर आत्मनिर्भर बनुन् भन्ने हो ।”

उहाँले प्रशिक्षण प्रदान गरेका धेरै महिला अहिले प्रशिक्षककै रुपमा काम गरिरहनु भएको छ । मेचीनगर–१३ की निर्मला खनालले उहाँबाट तालिम लिएर हाल प्रशिक्षकको रुपमा काम गरिरहेको बताउनुभयो । “व्याग र बुटिक सम्बन्धी तालिम दिएर उद्यमी बनाउनुभयो निर्मला दिदीले,” उहाँ भन्नुहुन्छ “जतिबेला म संकटबाट गुज्रिरहेकी थिएँ, त्यसबेला उहाँले नै तालिम दिएर हौसला बढाउनुभयो । अहिले उद्यमसँगै प्रशिक्षक समेत बनेर काम गरिरहेकी छु ।”

मेचीनगरको नारी कल्याणकारी महिला विकास संस्थाकी अध्यक्ष जानुका ओलीले प्रशिक्षक निर्मला चौहान भण्डारी समाजकी प्रेरणाकी स्रोत र उदाहरणीय व्यक्तित्व भएको बताउनुभयो । उहाँले असहाय र विपन्नलाई तालिम दिएर स्वरोजगार बनाउँदा सयौं महिलाहरु आत्मनिर्भर बन्न सफल भएको बताउनुभयो ।