२१ वैशाख २०८३, सोमवार
धुलाबारी, २१ वैशाख । मेची उद्योग वाणिज्य संघको आसन्न निर्वाचनमा दुई प्यानल चुनावी मैदानमा उत्रिएका छन् ।
निर्वाचन कार्यतालिका अनुसार आइतबार १६ पदका लागि दुई प्यानलबाट कूल ३२ जनाले उत्साहजनक रूपमा उम्मेदवारी दर्ता गराए । यसपटक प्यानल बाहिरबाट स्वतन्त्र उम्मेदवारी परेको छैन ।
निर्वाचनमा वर्तमान अध्यक्ष खेमराज प्रसाईले ‘साझा प्यानल’को नेतृत्व गर्नुभएको छ भने वर्तमान वरिष्ठ उपाध्यक्ष किशोर क्षेत्री (कपिल)ले ‘समावेशी प्यानल’ मार्फत आफ्नो दाबेदारी प्रस्तुत गर्नुभएको छ ।
चुनावी मैदानमा उत्रिएका दुवै प्यानललाई विभिन्न राजनीतिक दलहरूको साथ रहेको छ । ‘साझा प्यानल’लाई नेकपा एमाले, राष्ट्रिय स्वतन्त्र पार्टी (रास्वपा) र जसपा लगायतका दलहरूको समर्थन रहेको बुझिएको छ ।
अर्कोतर्फ, ‘समावेशी प्यानल’लाई नेपाली कांग्रेस, श्रम संस्कृति पार्टी र नेकपा लगायतका दलहरूले साथ दिएका छन् । रोचक कुरा त के छ भने, राष्ट्रिय प्रजातन्त्र पार्टी (राप्रपा)ले आफूलाई समर्थन गरेको दाबी दुवै प्यानलले गरिरहेका छन् ।
प्यानलगत उम्मेदवारी दर्तासँगै धुलाबारी क्षेत्रको व्यावसायिक माहोल तातिएको छ । दुवै प्यानल अहिले आफ्ना एजेन्डासहित मतदाता रिझाउन घरदैलो र प्रचारप्रसारमा व्यस्त देखिएका छन् । तर, केही उम्मेद्वार व्यक्तिगत रुपमा पनि भोट माग्न हिँडिरहेको पाइएको छ ।
