झापा, १३ भदौ । भौतिक पूर्वाधार तथा यातायात मन्त्री देवेन्द्र दाहालले आज काँकडभिट्टा–लौकही सडक योजनाको (पूर्वी खण्ड)मा भइरहेको पूर्वपश्चिम राजमार्गको विस्तार तथा स्तरोन्नति कार्यको अनुगमन गर्नु भएको छ ।

पूर्वपश्चिम राजमार्गको काँकडभिट्टादेखि केर्खासम्मको ४५ किलोमिटरलाई पूर्वीखण्ड मानेर सडकलाई एसियाली राजमार्गमा स्तरोन्नति कार्य धमाधम भइरहेको छ । निर्माण कार्यको ठेक्का एब्रास्कन कालिका जेभीले लिएको छ ।

मन्त्री दाहालले मेचीनगर नगरपालिका कार्यालयमा आयोजित सरोकारवालाहरुसँगको छलफल कार्यक्रममा बोल्दै राजमार्गको स्तरोन्नतिका क्रममा देखा परेका समस्या र जनताका मागहरुलाई व्यावहारिक रुपमा समाधान गरिने बताउनुभयो ।

सो अवसरमा मन्त्री दाहाललाई मेचीनगरका नगरप्रमुख गोपाल बुढाथोकीले पूर्वीनाका काँकडभिट्टादेखि प्यारीभिट्टा बसपार्कसम्म छ लेनको सडक विस्तार गरिनु पर्ने लगायतका सात बुँदे माग पत्र दिनु भएको थियो ।

नगरप्रमुख बुढाथोकीले पूर्वीद्वार काँकडभिट्टामा प्रसिद्ध साहित्यकार गोपाल योञ्जनको सालिक राख्न र घण्टाघर बनाउन राजमार्ग छेउमै स्थान उपलब्ध गराइदिन माग गर्नु भएको छ ।

यसैगरी, विर्तामोड नगरपालिकाका नगरप्रमुख पवित्र महतराले विर्तामोडको मुक्ति चोकमा रहेको ऐतिहासिक जनान्दोलन स्तम्भलाई राजमार्ग विस्तारका क्रममा हटाउँदा राजमार्गकै कुनै छेउमा सो स्तम्भलाई राख्ने स्थान उपलब्ध गराइदिन माग गर्नु भएको छ ।

मन्त्री दाहाल विस्तार भइरहेको राजमार्गको निरीक्षण गर्ने क्रममा विर्तामोड आइपुग्दा नगरप्रमुख महतराले उक्त माग राख्नु भएको हो ।

दमक, मेचीनगर, कनकाई र पथरी क्षेत्रबाट राजमार्ग विस्तारका लागि बनाइएको डिजाइनमा थोरै फेरबदल गरेर व्यावहारिक बनाउन मन्त्री दाहालसमक्ष माग आइरहेको उहाँको प्रेस संयोजक गोपाल झापालीले बताउनुभयो ।

मन्त्री दाहालले आजै दमकस्थित नवनिर्मित काँकडभिट्टा–लौकही सडक योजना (पूर्वी खण्ड)को कार्यालयको उद्घाटन गर्नु भएको छ । उद्घाटन क्रममा बोल्दै मन्त्री दाहालले सडक विस्तारको काम निर्धारित समयमै सम्पन्न गरिसक्न निर्देशन दिनु भएको थियो । 

आयोजनाका प्रमुख सुनिलबाबु पन्तका अनुसार उक्त कार्यालय भवन रु. आठ करोड सात लाखको लागतमा निर्माण भएको हो । आयोजनाको काम सम्पन्न भएपछि उक्त भवन सडक विभागलाई हस्तान्तरण गरिने उहाँले जानकारी दिनुभएको छ ।

मन्त्री दाहालको अनुगमन कार्यक्रममा सडक विभागका महानिर्देशक डा. विजय जैसी, एसियाली विकास बैंक (एडीबी) परियोजना प्रमुख चुडाराज ढकाल, आयोजनाका प्रमुख सुनिलबाबु पन्त लगायतको उपस्थिति रहेको थियो ।