झापा, १४ भदौ । विर्तामोड नगरपालिका वडा नं. २ स्थित ड्रिमल्यान्ड पार्कको स्वीमिङ पुलमा डुबेर ३३ वर्षीय प्रकाश प्रसाईको मृत्यु भएको छ ।

विर्तामोड नगरपालिका ३ निवासी प्रसाई र विर्तामोड नगरपालिका १० का ३३ वर्षीय केशव शिवाकोटी शुक्रवार तीन बजेतिर घुम्न र पौडी खेल्न उक्त स्वीमिङ पुलमा गएका थिए । पौडी खेल्ने क्रममा प्रसाईको मृत्यु भएको भनी राति आठ बजेतिर पार्क सञ्चालकले जानकारी दिएको जिल्ला प्रहरी कार्यालय झापाका सूचना अधिकारी खगेन्द्रबहादुर खड्काले बताउनुभयो ।

उक्त स्वीमिङ पुलको सञ्चालक जीवन ढुंगाना रहेका छन् । मृतक प्रसाई ओमकार रेडिमिक्स कंक्रिट प्रालिका सञ्चालक हुन् । राति नै घटनास्थलमा पुगेर प्रहरीले घटनाको अनुसन्धान सुरु गरेको जनाएको छ ।