झापा, १४ भदौ । मानव बेचविखनविरुद्ध पूर्वीनाकामा सक्रिय माइती नेपालले एक वर्षमा हराएका नागरिकमध्ये १८ जनालाई भारतमा फेला पारेर आफन्तलाई बुझाएको जनाएको छ ।

आर्थिक वर्ष २०८१/८२ मा विभिन्न जिल्लामा हराएका ६९ जना नेपालीको खोजीका लागि कार्यालयमा निवेदन परेको संस्थाका प्रदेश प्रमुख गोविन्द घिमिरेले बताउनुभयो ।

भेटिएकामध्ये १८ जनालाई भारतको विभिन्न सहरबाट खोजी गरेर ल्याइएको र दुई जना नेपालभित्रै फेला परेको उहाँले बताउनुभयो । पूर्वीनाका काँकडभिट्टामा निगरानी गर्दै आएको माइती नेपालले मानव बेचविखनको नियन्त्रण, रोकथाम तथा न्यूनीकरणका लागि क्रियाकलाप गर्दै आएको छ ।

आव २०८०/०८१ मा ६२ जना हराएको निवेदन आएकोमा १६ जना भेटिएको कार्यालयले जनाएको छ । भारततर्फ जोखिमपूर्वक जान लागेका १६८ जनालाई सो अवधिमा सीमाबाट फर्काइएको थियो ।

“वैदेशिक रोजगारी र विवाहको नाममा परिवारलाई थाहै नदिई भारत जानेहरु हराएको भनेर आफन्तले भन्ने गर्नुहुन्छ,” प्रदेश कार्यालयका प्रमुख घिमिरेले भन्नुभयो– “हराउनेहरु अधिकांश महिला हुने गरेका छन् । खोज्दै जाँदा कतिपय मानव बेचविखन गर्ने गिरोहको शिकार पनि भएको पाइन्छ भने कतिपय अलपत्र परेर भौतारिरहेको भेटिन्छ ।”

भेटिएका व्यक्तिहरुलाई अभिभावकले कार्यालयमै आएर जिम्मा बुझेर लैजाने गरेको उहाँले जानकारी दिनुभयो । परिवारबाट विरक्तिएर जानेहरु भारततिरै रोजगारी गरेर लुक्ने र कतिपयले नयाँ घरजम गरेर बस्ने भएकाले हराएकामध्ये धेरैजसो नभेटिएको उहाँको भनाई छ ।

माइती नेपालले पूर्वीनाका काँकडभिट्टामा तैनाथ गरेको टोलीले भारततर्फ जान लागेका संदिग्ध बालबालिका, किशोरी र महिलाको नियमित निगरानी गर्दै आएको छ । आव २०८१/८२ मा जोखिममा परेर भारत जान लागेका १५८ जनालाई संस्थाले सम्झाई बुझाई नाकामा रोकेर घर फर्काएको छ । नाकाबाट लुकीछिपी गएका चार जनालाई भारतबाट उद्धार गरेर समेत ल्याएको छ ।

उहाँका अनुसार विगतको तुलनामा पूर्वीनाकामा नेपाल र भारत दुबैतर्फका सुरक्षाकर्मीहरुको निगरानी कडा रहेको छ । चेलीबेटी बेचविखन रोकथामको क्षेत्रमा काम गर्दै आएका माइती नेपाल लगायतका संघ–संस्थाहरुले सुरक्षा निकायसँग सहकार्य गरिरहेको उहाँले जानकारी दिनुभयो ।

पूर्वीनाकाका कडाई भएपति मानव बेचविखनमा सक्रिय बिचौलियाहरुले झापाको सीमावर्ती गौडा र सहायक मार्गहरु समेत प्रयोग गर्न थालेको घिमिरेले बताउनुभयो । दक्षिणका भेगका गौरीगंज, कचनकवल लगायतका ग्रामीण क्षेत्रका सडक प्रयोग गरेर मानव तस्करीका गतिविधि हुनसक्ने भएकाले स्थानीयबासीले समेत चासो बढाउनु पर्ने अवस्था आएको उहाँको भनाई छ ।

आव २०८१/८२ मा माइती नेपालको काँकडभिट्टा कार्यालयले दुईवटा बलात्कार र सात वटा घरेलु हिंसाका घटना सम्बन्धित निकायमा दर्ता गराएको छ । आव २०८०/०८१ मा दुई वटा बलात्कार र १४ वटा घरेलु हिंसाका घटना दर्ता भएका थिए ।

(फोटो : दिल्लीबाट उद्धार भएका नेपाली महिलाहरुको फाइल फोटो)