झापा, १५ भदौ । राष्ट्रिय प्रजातन्त्र पार्टीका अध्यक्ष एवम् पूर्व उपप्रधानमन्त्री राजेन्द्र लिङ्देनले गैरआवासीय नेपालीहरुको बंशजको नागरिकताले निरन्तरता पाउनु पर्ने माग गर्नु भएको छ ।
पार्टीको जिल्ला कार्य समितिद्वारा आज विर्तामोडमा आयोजित पत्रकार सम्मेलनमा बोल्दै उहाँले विदेशमा बसोबास गरिरहेका नेपालीहरुलाई नेपालको समृद्धिमा जोड्नका लागि उनीहरुको बंशजको नागरिकताले निरन्तरता पाउनु पर्ने तर्क गर्नुभयो ।
“हामीकहाँ दुई वटा नेपाल छन्,” उहाँले भन्नुभयो– “एउटा मेची महाकालीको नेपाल र अर्को नेपाल बाहिरको प्रवासको नेपाल । प्रवासका रहेका नेपाली भूगोल बाहिर छन् । तर, उनीहरु यहाँको मानिसले भन्दा बेसी नेपालको बारेमा चिन्ता गर्छन् ।”
वि.सं. २०६३/६३ को राजनीतिक परिवर्तनपछि आएको नागरिकता ऐनको संशोधनमा दोहोरो नागरिकता राख्न नपाउने प्रावधानले विदेशमा कमाउन, अध्ययन गर्न र रोजगारीको खोजीमा पुगेका बंशजका नेपाली नागरिकहरुलाई ठूलो असर पुर्याएको उहाँको भनाई छ ।
“देशमा अवसर नपाएपछि अवसरको खोजी र पढाइको सन्दर्भमा विदेश पुगेका नेपालीहरुलाई त्यहाँको देशले उताको नागरिकता दिएको हो,” उहाँले भन्नुभयो– “दीर्घकालीन रुपमा काम गर्ने हो भने उताको देशले नागरिकता लिनु पर्छ भनेको हो । नेपालीहरुले उताको नागरिकता लिए । तर, जुन देशले नागरिकता दियो, उसले नेपालको नागरिकता त्याग्नु पर्छ भनेकै थिएन । उनीहरुले कमाउँदै नेपालमा पैसा पठाएकै थिए । यहीबीचमा दोहोरो नागरिकता राख्न नपाउने नाममा बंशजको नेपाली नागरिकताको निरन्तरतालाई समाप्त पारियो । जुन राष्ट्रहित विपरीत थियो ।”
उहाँले बंशजको नागरिकता समाप्त पारिएपछि विदेशबाट कमाएर नेपाल ल्याउनेभन्दा यता नेपालमा रहेको सम्पत्तिलाई गैरकानूनी बाटोबाट विदेश पुर्याउने क्रम बढेको बताउनुभयो ।
राष्ट्रिय प्रजातन्त्र पार्टी विदेशमा शिप सिकेर आर्जन गरिरहेका नागरिकसँग सम्पर्क टुटाउने नागरिकता ऐनलाई सच्याएर बंशजको नागरिकतालाई निन्तरता दिनुपर्ने पक्षमा रहेको उहाँको धारणा थियो ।
