२८ कार्तिक २०८२, बिहिवार
झापा, २७ कात्तिक । जेनजी आन्दोलनका क्रममा हिरासतबाट फरार दुई जना थुनुवा आज आफ्नै घरबाट पक्राउ परेका छन् ।
पक्राउ पर्नेमा विर्तामोड नगरपालिका वडा नं. ८ का ३३ वर्षीय सरोज पौडेल र सोही ठेगानाका २५ वर्षीय पंकराज मैनाली रहेको जिल्ला प्रहरी कार्यालय झापाले जनाएको छ ।
जेनजी आन्दोलनको क्रममा दुबै थुनुवा विर्तामोडको अनारमनी इलाका प्रहरी कार्यालयको हिरासतबाट भागेका थिए । दुबै थुनुवा लागू औषध कसुरमा अनुसन्धानका लागि हिरासतमा राखिएका थिए । पक्राउपछि दुबैलाई पुनः इप्रका अनारमनीमा ल्याइएको छ ।
यसअघि बाह्रदशी गाउँपालिका वडा नं. ४ रामचोकमा डेरा गरी बस्दै आएका २७ वर्षीय ईसरप खातुन र सोही वडा निवासी २२ वर्षीय विकास टुडु जेनजी आन्दोलनमा लुटिएको हतियारका गोलीसहित पक्राउ परेका छन् ।
जिल्ला प्रहरी कार्यालय र इप्रका अनारमनीको संयुक्त टोलीले विर्तामोड–२ रामचोकस्थित लालबहादुर गिरीको घरमा डेरा बस्दै आएका ईसरुप खातुनको कोठामा बुधवार तलासी लिदा एसएलआरको ३८ राउन्ड र इन्सास राइफलको १६ राउन्डसहित लुटपाटका सामान बरामद गरेको जिल्ला प्रहरी कार्यालय झापाको प्रवक्ता खगेन्द्रबहादुर खड्काले बताउनुभयो ।
जिल्लाका विभिन्न प्रहरी कार्यालयको भवन र सवारी साधन तोडफोड, आगजनी र लुटपाटमा संलग्न १२ जनालाई प्रहरीले यसअघि पक्राउ गरिसकेको छ ।
भदौ २४ गते झापाको अनारमनी, सुरुङ्गा र दमकस्थित इलाका प्रहरी कार्यालयमा आगजनी, तोडफोड, लुटपाट र प्रहरी कर्मचारीमाथि आक्रमणका घटना भएका थिए । उक्त घटनाको सीसीटीभी फुटेज, भिडियो र फोटोहरुको अध्ययन र विश्लेषणका आधारमा अभियुक्तको पहिचान गरी नियन्त्रणमा लिइएको खड्काले बताउनुभयो ।
